ឧបនាយករដ្ឋមន្រ្តី ម៉ែន សំអន ដង្ហែរអង្គកឋិនទានទៅវត្តព្រះបារមីវង្គត់បូរីកបិលភ័ស្តនានាព្រឹកស្អែក
ភ្នំពេញ៖ រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ឧបនាយករដ្ឋមន្រ្តី ម៉ែន សំអន នឹងដង្ហែរអង្គកឋិនទានទៅកាន់វត្តព្រះបារមីវង្គត់បូរីកបិលភ័ស្ត ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ នាព្រឹកស្អែកទី១៤ ខែវិច្ឆិកា ឆ្នាំ២០២១។
ការដង្ហែរអង្គកឋិននេះ ដើម្បីនាំមកនូវគ្រឿងទេយ្យទានជាអង្គកឋិនមាន ស្បង់ ចីវរ និងសង្ឃាដី ក្រៅពីនេះគឺជាបរិក្ខារបស់អង្គកឋិនទាំងអស់ រួមនិងបច្ច័យជាច្រើនទៀតសម្រាប់នាំមកវេរប្រគេនដល់ព្រះសង្ឃដែលគង់ចាំព្រះវស្សាអស់ត្រីមាសក្នុងពុទ្ធសីមានីមួយៗសម្រាប់ប្រើប្រាស់កសាងសមិទ្ធផលនានាក្នុងទីអារាម។
ការរៀបចំផ្តួចផ្តើមអង្គកឋិនទាននេះគឺដើម្បីឧទ្ទិសជូននូវបុណ្យកុសលទាំងឡាយ ដែលកើតពីសទ្ធាជ្រះថ្លា ធ្វើបុណ្យកឋិនទានសាមគ្គីនេះ ជូនចំពោះជីដូនជីតា ញាតិកាទាំងប្រាំពីរសណ្តានដែលបានចែកឋានទៅកាន់លោកខាងមុខ ព្រមទាំងបានជូននូវបុណ្យកុសលចំពោះអ្នកចូលរួម និងពុទ្ធបរិស័ទចំណុះជើងវត្តជាអ្នកផ្តើមបុណ្យសូមបានសុខ ចំរុងចំរើនជារៀងរហូតទៅ៕